പ്രവാസികൾക്ക് തിരിച്ചടി: ഇന്ത്യൻ കോൺസുലർ സേവനങ്ങൾ മുടങ്ങി, അടിയന്തര ആവശ്യങ്ങൾക്ക് പുതിയ ഹെൽപ്‌ലൈൻ

Published: Tuesday, 30 June 2026, at 6:19 pm| Dubai | Edited: Tuesday, 03 JuLY 2026, at 10:27 am

അബ്ദുദാബി: യുഎഇയിലെ ഇന്ത്യൻ പ്രവാസികൾക്കായുള്ള പാസ്‌പോർട്ട്, വിസ, അറ്റസ്റ്റേഷൻ ഉൾപ്പെടെയുള്ള കോൺസുലർ സേവനങ്ങൾ താൽക്കാലികമായി പരിമിതപ്പെടുത്തിയതായി അബുദാബി ഇന്ത്യൻ എംബസിയും (Indian consular services in UAE) ദുബായ് കോൺസുലേറ്റും അറിയിച്ചു. ഭരണപരമായ കാരണങ്ങളാൽ ജൂലൈ 1 വരെ അടിയന്തര സേവനങ്ങൾ മാത്രമായിരിക്കും ലഭ്യമാകുക. ഈ സാഹചര്യത്തിൽ പ്രവാസികൾ ശ്രദ്ധിക്കേണ്ട കാര്യങ്ങൾ എന്തൊക്കെയാണെന്ന് നോക്കാം..

ALSO READ: ​

• ഇന്ത്യൻ പാസ്‌പോർട്ട് നിരക്കുകളിൽ വൻ വർധന, ജൂലൈ 1 മുതൽ നിരക്കുകൾ കുത്തനെ ഉയരുന്നു; പുതിയ നിരക്കുകൾ അറിയാം
• ​നോർക്ക റൂട്ട്സ് രജിസ്ട്രേഷൻ: ​പ്രവാസികൾക്ക് ഇനി സർക്കാർ പിന്തുണ കൈപ്പിടിയിൽ; സർക്കാർ നൽകുന്ന സുരക്ഷയും സേവനങ്ങളും; അറിയേണ്ടതെല്ലാം!
• ഒമാനിൽ ഇന്ത്യന്‍ പാസ്‌പോര്‍ട്ട് സേവനങ്ങള്‍ക്ക് ഇനി മുതൽ പുതിയ ഫീസ് നിരക്ക്: പുതിയ നിരക്കുകൾ അറിയാം…

കോൺസുലർ സേവനങ്ങൾ മുടങ്ങാനുള്ള കാരണം എന്ത്?

ഔദ്യോഗികമായി ഭരണപരമായ കാരണങ്ങളാണ് അധികൃതർ വ്യക്തമാക്കുന്നതെങ്കിലും, വിസ-പാസ്‌പോർട്ട് ഔട്ട്‌സോഴ്‌സിങ് ഏജൻസി കരാറുമായി ബന്ധപ്പെട്ട് ഇന്ത്യയിലെ സുപ്രീം കോടതിയിലുള്ള നിയമപോരാട്ടമാണ് നിലവിലെ പ്രതിസന്ധിക്ക് കാരണം.

യുഎഇയിലെ കോൺസുലർ സേവനങ്ങൾ പുതിയ ഏജൻസിക്ക് കൈമാറാൻ ഇന്ത്യൻ സർക്കാർ തീരുമാനിച്ചിരുന്നു.എന്നാൽ ടെൻഡർ നടപടികളിലെ ക്രമക്കേടുകൾ ഉന്നയിച്ച് നിലവിലെ സേവനദാതാക്കൾ കോടതിയെ സമീപിക്കുകയായിരുന്നു.കേസിൽ അന്തിമ തീരുമാനം ഉണ്ടാകുന്നതുവരെ നിലവിലെ സ്ഥിതി തുടരാൻ സുപ്രീം കോടതി ഉത്തരവിട്ടതോടെ കാര്യങ്ങൾ സങ്കീർണ്ണമാവുകയായിരുന്നു.

പഴയ ഏജൻസിയുടെ കാലാവധി അവസാനിക്കുകയും, കോടതി ഉത്തരവുള്ളതിനാൽ പുതിയ ഏജൻസിക്ക് ചുമതലയേൽക്കാൻ കഴിയാതെ വരികയും ചെയ്തതോടെ കേന്ദ്രങ്ങളുടെ പ്രവർത്തനം പൂർണ്ണമായി നിലക്കുകയായിരുന്നു.

സേവനങ്ങൾ മുടങ്ങുന്നത് പ്രവാസികളെ എങ്ങനെ ബാധിക്കും?

പ്രതിദിനം ശരാശരി 3,500 ഓളം അപേക്ഷകൾ കൈകാര്യം ചെയ്യുന്ന കേന്ദ്രങ്ങൾ ഒറ്റയടിക്ക് പൂട്ടിയത് യുഎഇയിലെ 35 ലക്ഷത്തോളം വരുന്ന ഇന്ത്യൻ പ്രവാസികളെ വലിയ ദുരിതത്തിലാക്കിയിട്ടുണ്ട്. ആരൊക്കെയാണ് ഇത് ബാധിക്കുക എന്ന് നോക്കാം..

• വിസ കാലാവധി തീരുന്നവർ: വിസ പുതുക്കുന്നതിനായി പാസ്‌പോർട്ട് അടിയന്തരമായി പുതുക്കേണ്ട തൊഴിലാളികൾ നിയമക്കുരുക്കിലാകാൻ സാധ്യതയുണ്ട്.
• അടിയന്തര യാത്രക്കാർ: പെട്ടെന്ന് നാട്ടിലേക്ക് പോകേണ്ടവർക്ക് പാസ്‌പോർട്ട് പുതുക്കാനോ മറ്റ് യാത്രാരേഖകൾ ശരിയാക്കാനോ സാധിക്കുന്നില്ല.
• ഉദ്യോഗാർത്ഥികളും വിദ്യാർത്ഥികളും: പുതിയ ജോലിക്കായോ ഉപരിപഠനത്തിനായോ സർട്ടിഫിക്കറ്റുകൾ സാക്ഷ്യപ്പെടുത്തേണ്ടവർ (Attestation) വലിയ പ്രതിസന്ധിയിലാണ്.

അടിയന്തര സഹായത്തിന് ഹെൽപ് ലൈൻ സംവിധാനം

കോൺസുലർ സേവനങ്ങൾ തടസ്സപ്പെട്ട പശ്ചാത്തലത്തിൽ അടിയന്തര ആവശ്യങ്ങളുള്ള പ്രവാസികളെ സഹായിക്കാൻ കോൺസുലേറ്റ് പ്രത്യേക ഹെൽപ് ലൈൻ നമ്പറുകൾ ക്രമീകരിച്ചിട്ടുണ്ട്.

• ടോൾ ഫ്രീ നമ്പർ: 800 46342
• വാട്സാപ് നമ്പർ: +971 54 309 0571

കൂടാതെ ഔദ്യോഗിക ഇമെയിൽ വിലാസം വഴിയും അടിയന്തര ആവശ്യങ്ങൾക്കായി പ്രവാസികൾക്ക് അധികൃതരെ ബന്ധപ്പെടാം.

ഈ സാഹചര്യത്തിൽ പ്രവാസികൾ ശ്രദ്ധിക്കേണ്ട കാര്യങ്ങൾ

യുഎഇയിലുള്ള മലയാളി പ്രവാസികൾ ഈ പ്രതിസന്ധി ഘട്ടത്തിൽ താഴെ പറയുന്ന കാര്യങ്ങൾ പ്രത്യേകം ശ്രദ്ധിക്കേണ്ടതാണ്.

• വ്യാജ പ്രചാരണങ്ങളിൽ വീഴരുത്: കോൺസുലർ സേവനങ്ങളുമായി ബന്ധപ്പെട്ട് സോഷ്യൽ മീഡിയകളിൽ വരുന്ന വ്യാജ വാർത്തകളിൽ വഞ്ചിതരാകരുത്.
• ഔദ്യോഗിക പേജുകൾ മാത്രം ആശ്രയിക്കുക: ജൂലൈ 2 മുതലുള്ള സാധാരണ സേവനങ്ങളുടെ പുനരാരംഭം സംബന്ധിച്ച വിവരങ്ങൾ എംബസിയുടെയും കോൺസുലേറ്റിന്റെയും ഔദ്യോഗിക സോഷ്യൽ മീഡിയ പേജുകൾ വഴി മാത്രമേ പരിശോധിക്കാവൂ.
• ഹെൽപ് ലൈൻ ഉപയോഗിക്കുക: വിസ കാലാവധി തീരുന്നതോ മറ്റ് അടിയന്തര പ്രാധാന്യമുള്ളതോ ആയ വിഷയങ്ങളുണ്ടെങ്കിൽ മുകളിൽ നൽകിയ ഹെൽപ് ലൈൻ നമ്പറുകളിലോ വാട്സാപ്പിലോ ഉടൻ ബന്ധപ്പെട്ട് സഹായം തേടുക.

വിഷയം കോടതിയുടെ പരിഗണനയിലായതിനാൽ സാധാരണ സേവനങ്ങൾ എപ്പോൾ പുനരാരംഭിക്കുമെന്നതിൽ വ്യക്തതയില്ല. എങ്കിലും, പ്രവാസികളുടെ ദുരിതം കണക്കിലെടുത്ത് എംബസി നേരിട്ട് താൽക്കാലിക സംവിധാനമൊരുക്കണമെന്ന ആവശ്യത്തിലാണ് പ്രവാസി സംഘടനകൾ.

ALSO READ:

• വിദേശത്തുനിന്ന് ഇന്ത്യയിലെത്തുന്നവർക്ക് ‘ഡിജിറ്റൽ ഫോം’ നിർബന്ധം: പ്രതിരോധ നടപടികളുമായി ഇന്ത്യ
• ഇന്ത്യൻ പാസ്പോർട്ട് പൗരത്വ രേഖയല്ലെന്നു വിദേശകാര്യ മന്ത്രാലയം: അങ്ങനെയങ്കിൽ നമ്മുടെ പൗരത്വം തെളിയിക്കാൻ ഇനി ഈ രേഖകളും കയ്യിലുണ്ടാവണം
• എമിറേറ്റ്സ് എയർവേയ്സിൽ ജോലി ഒഴിവുകൾ: ഇന്ത്യയിലും ഇന്റർവ്യൂകൾ; എങ്ങനെ അപേക്ഷിക്കാം? അറിയാം….

English Summary: The Indian Embassy and Consulate announced that Indian consular services in UAE are temporarily limited to emergency cases until July 1 due to administrative reasons. A legal dispute in India over outsourcing contracts has halted routine passport and visa processing, impacting thousands of expats.