ഉരുക്കുകോട്ടയിൽ വിള്ളൽ; അപ്രതീക്ഷിത സ്ഥാനാർത്ഥിയിലൂടെ ചരിത്രം തിരുത്തി യുഡിഎഫ്

Published: Monday, 4 May 2026, at 3:58 pm| Dubai | Edited: Monday, 4 May 2026, at 3:58 pm

കാസർകോട്: കേരള രാഷ്ട്രീയത്തെ ഒന്നാകെ അത്ഭുതപ്പെടുത്തിക്കൊണ്ട് തൃക്കരിപ്പൂർ നിയമസഭാ മണ്ഡലത്തിൽ യുഡിഎഫ് സ്ഥാനാർഥി സന്ദീപ് വാര്യർ ചരിത്ര വിജയം സ്വന്തമാക്കിയിരിക്കുകയാണ് (Kerala Election Results 2026). ഇടതുപക്ഷത്തിന്റെ ഉരുക്കുകോട്ടയെന്ന് വിശേഷിപ്പിക്കപ്പെടുന്ന തൃക്കരിപ്പൂരിൽ സന്ദീപിന്റെ ഈ വിജയം അക്ഷരാർത്ഥത്തിൽ രാഷ്ട്രീയ പണ്ഡിതന്മാരുടെ കണക്കുകൂട്ടലുകളെല്ലാം തെറ്റിച്ചിരിക്കുകയാണ്. എൽഡിഎഫ് സ്ഥാനാർഥി വി.പി.പി. മുസ്തഫയെ പരാജയപ്പെടുത്തിയാണ് സന്ദീപ് ഇത്തവണ നിയമസഭയിലേക്ക് എത്തുന്നത്.

മണ്ഡലത്തിന്റെ രൂപീകരണ കാലം മുതൽ ഇടതുപക്ഷത്തിനൊപ്പം മാത്രം നിന്നിട്ടുള്ള തൃക്കരിപ്പൂരിൽ ഒരു കോൺഗ്രസ് സ്ഥാനാർഥി വിജയക്കൊടി പാറിക്കുന്നത് ഇതാദ്യമായാണ്. അപ്രതീക്ഷിതമായ സ്ഥാനാർഥിത്വവും രാഷ്ട്രീയ വെല്ലുവിളികളും അതിജീവിച്ചാണ് സന്ദീപ് വാര്യർ ഈ നേട്ടം കൈവരിച്ചത്.

ALSO READ: പിണറായിയെ വിറപ്പിച്ച പോരാളി: ആരാണ് അബ്ദുൽ റഷീദ്?

അടുത്ത മുഖ്യമന്ത്രിയാര്? കോൺഗ്രസിൽ വടംവലി; ലീഗിന്റെ പിന്തുണ ആർക്ക്?

അപ്രതീക്ഷിത സ്ഥാനാർഥിത്വം: തൃക്കരിപ്പൂരിലെ സന്ദീപ് വാര്യർ

തൃക്കരിപ്പൂർ മണ്ഡലത്തിൽ സന്ദീപ് വാര്യർ മത്സരിക്കുമെന്ന് രാഷ്ട്രീയ കേന്ദ്രങ്ങളിൽ ഒരിടത്തും ചർച്ചകൾ ഉണ്ടായിരുന്നില്ല. കേരള കോൺഗ്രസിന്റെ പക്കലായിരുന്ന ഈ സീറ്റ് ഇത്തവണ കോൺഗ്രസ് ഏറ്റെടുക്കാൻ തീരുമാനിച്ചതോടെയാണ് കാര്യങ്ങൾ മാറിമറിഞ്ഞത്.

ഡിസിസി പ്രസിഡന്റ് പി.കെ. ഫൈസൽ, യൂത്ത് കോൺഗ്രസ് നേതാവ് ജോമോൻ ജോസ്, ബാലകൃഷ്ണൻ പെരിയ തുടങ്ങിയ പ്രമുഖ നേതാക്കളുടെ പേരുകളാണ് ആദ്യഘട്ടത്തിൽ മണ്ഡലത്തിലേക്ക് പരിഗണിക്കപ്പെട്ടിരുന്നത്.

എന്നാൽ രണ്ടാം ഘട്ട സ്ഥാനാർഥി പട്ടികയിൽ മറ്റ് മണ്ഡലങ്ങളിൽ സന്ദീപിന് ഇടം ലഭിക്കാതെ വന്നതോടെയാണ് ഏറ്റവും ഒടുവിൽ തൃക്കരിപ്പൂർ അദ്ദേഹത്തിന് നൽകിയത്. തുടക്കത്തിൽ പ്രാദേശിക നേതാക്കൾക്കിടയിൽ ചില പ്രതിഷേധങ്ങൾ ഉയർന്നെങ്കിലും, പാർട്ടി ഒറ്റക്കെട്ടായി രംഗത്തിറങ്ങിയതോടെ പ്രചാരണ രംഗത്ത് സന്ദീപ് വാര്യർ വലിയ മുന്നേറ്റം നടത്തി. ഈ ഐക്യമാണ് തൃക്കരിപ്പൂരിലെ വിജയത്തിന് അടിത്തറ പാകിയത്.

ഇടതുപക്ഷത്തിന്റെ തകരാത്ത കോട്ടയിലെ വിള്ളൽ

1977-ൽ തൃക്കരിപ്പൂർ മണ്ഡലം നിലവിൽ വന്നതിന് ശേഷം നടന്ന പത്ത് തിരഞ്ഞെടുപ്പുകളിലും ഇടതുപക്ഷത്തിനല്ലാതെ മറ്റൊരു മുന്നണിക്കും ഇവിടെ വിജയിക്കാൻ സാധിച്ചിരുന്നില്ല. മുൻ മുഖ്യമന്ത്രി ഇ.കെ. നായനാർ ഉൾപ്പെടെയുള്ള അതികായർ മത്സരിക്കാൻ തിരഞ്ഞെടുത്ത ഈ മണ്ഡലം എക്കാലത്തും സിപിഎമ്മിന്റെ കരുത്തിന്റെ അടയാളമായിരുന്നു. ഇടതുമുന്നണിയിൽ സിപിഎം മാത്രം മത്സരിക്കുന്ന ഈ മണ്ഡലത്തിൽ മറ്റാർക്കും പഴുതുകൾ നൽകില്ലെന്ന ഉറച്ച വിശ്വാസത്തിലായിരുന്നു എൽഡിഎഫ് നേതൃത്വം.

കഴിഞ്ഞ നിയമസഭാ തിരഞ്ഞെടുപ്പിലും വലിയ ഭൂരിപക്ഷത്തിലാണ് സിപിഎം ഇവിടെ വിജയിച്ചത്. അന്ന് എം. രാജഗോപാലൻ 16,959 വോട്ടുകൾക്കാണ് കോൺഗ്രസ് സ്ഥാനാർഥിയെ പരാജയപ്പെടുത്തിയത്. എന്നാൽ അഞ്ചുവർഷത്തിനിപ്പുറം മണ്ഡലത്തിലെ വോട്ടർമാരുടെ മനസ്സ് മാറിയെന്ന് തെളിയിക്കുന്നതാണ് സന്ദീപ് വാര്യരുടെ മിന്നും ജയം.

ചരിത്രം തിരുത്തിയെഴുതിയ വിജയം

മണ്ഡലം പിറന്നത് മുതൽ കയ്യിലുണ്ടായിരുന്ന സീറ്റ് നഷ്ടപ്പെട്ടത് സി‌പി‌എമ്മിനെ സംബന്ധിച്ച് വലിയ ആഘാതമാണ്. വി.പി.പി. മുസ്തഫ എന്ന ശക്തനായ നേതാവിനെ അണിനിരത്തിയിട്ടും കോട്ട കാക്കാൻ സാധിക്കാത്തത് പാർട്ടിക്ക് വലിയ തിരിച്ചടിയായി. സന്ദീപ് വാര്യരുടെ വ്യക്തിപ്രഭാവവും യുഡിഎഫിന്റെ ചിട്ടയായ പ്രവർത്തനവും തൃക്കരിപ്പൂരിലെ സാധാരണക്കാരായ വോട്ടർമാരെ സ്വാധീനിച്ചു എന്നാണ് വിലയിരുത്തപ്പെടുന്നത്.

ഇടതുപക്ഷം മാത്രം ജയിച്ചു ശീലിച്ച മണ്ണിൽ മാറ്റം അനിവാര്യമാണെന്ന വോട്ടർമാരുടെ തീരുമാനം സന്ദീപ് വാര്യരുടെ വിജയത്തിന് കാരണമായി. ഈ വിജയം കാസർകോട് ജില്ലയിലെ കോൺഗ്രസ് രാഷ്ട്രീയത്തിന് പുതിയൊരധ്യായമാണ് തുറന്നിരിക്കുന്നത്.

ALSO READ: കൊച്ചിയിലേക്ക് റെക്കോർഡ് നിരക്ക്; ഗൾഫ് മലയാളികളെ പിഴിഞ്ഞ് വിമാനക്കമ്പനികൾ

ഉപമുഖ്യമന്ത്രി പദം കിട്ടുമോ? ലീഗിന്റെ നിലപാട് ഇങ്ങനെ..

The Kerala Election Results 2026 have delivered a historic blow to the Left strongholds in Kasaragod. In a surprising turn of events, the Congress party captured the Uduma and Trikaripur seats after decades. This victory marks a significant political shift, breaking the long-standing dominance of the LDF in these traditional fortresses.