കേരളത്തിൽ പുതിയ ജില്ല വരുന്നു: എന്താണ് ഗുണം? എന്തൊക്കെയാണ് വെല്ലുവിളികൾ? അറിയാം…

Published: Monday, 24 August 2026, at 9:06 am| Dubai | Edited: Monday, 24 August 2026, at 9:19 am

നാലര പതിറ്റാണ്ട് നീണ്ട കാത്തിരിപ്പിനൊടുവിൽ മൂവാറ്റുപുഴ ജില്ല (Muvattupuzha district) എന്ന സ്വപ്നത്തിന് വീണ്ടും ചിറകുമുളയ്ക്കുന്നു. എറണാകുളം, ഇടുക്കി ജില്ലകളുടെ അതിർത്തി മേഖലകൾ ഉൾപ്പെടുത്തി പുതിയ ജില്ല രൂപീകരിക്കുന്നത് സംബന്ധിച്ച് പുനർനിർണയ കമ്മീഷനെ നിയമിക്കുമെന്ന് മുഖ്യമന്ത്രി പ്രഖ്യാപിച്ചതോടെ ചർച്ചകൾ വീണ്ടും സജീവമായിരിക്കുകയാണ്.

ALSO READ:

• ഭാവിയിൽ എന്താകണം?എന്ന് കൗമാരക്കാരോട് ചോദിക്കല്ലേ!; സമ്മർദ്ദം കുറയ്ക്കാൻ നിർദേശങ്ങളുമായി ഖത്തർ QCDC
• വർക്ക് പെർമിറ്റ് വിസയ്ക്ക് പ്രായപരിധി: ഒമാനിൽ ആശങ്കയിലായി പ്രവാസികൾ, പലരുടെയും അപേക്ഷകൾ നിരസിച്ചു
• നിസാരമെന്ന് കരുതുന്ന ഈ 3 ശീലങ്ങൾ നിങ്ങളെ അപകടത്തിലാക്കും: സൈബർ മുന്നറിയിപ്പുമായി അബുദാബി

നാലര പതിറ്റാണ്ടിന്റെ ചരിത്രവും പശ്ചാത്തലവും

1982-ൽ അന്നത്തെ മുഖ്യമന്ത്രി കെ. കരുണാകരനാണ് മൂവാറ്റുപുഴ ജില്ല എന്ന ആശയം ആദ്യം മുന്നോട്ടുവെച്ചത്. തുടർന്ന് പഠനത്തിനായി ഡി. ബാബുപോൾ കമ്മീഷനെ നിയമിച്ചെങ്കിലും റിപ്പോർട്ട് രാഷ്ട്രീയമായി നടപ്പിലായില്ല. പത്തനംതിട്ടയ്ക്ക് ശേഷം പുതിയൊരു ജില്ല വരികയാണെങ്കിൽ അത് മൂവാറ്റുപുഴയായിരിക്കുമെന്നായിരുന്നു അന്നത്തെ ലീഡറുടെ വാഗ്ദാനം.

വർഷങ്ങൾക്ക് ശേഷം മൂവാറ്റുപുഴ നഗരസഭയുടെ ഓണാഘോഷ പരിപാടിയിലാണ് പുതിയ ജില്ലാ പുനർനിർണയ കമ്മീഷനെക്കുറിച്ച് മുഖ്യമന്ത്രി സൂചന നൽകിയത്. ഇതോടെ മലബാറിലെ തിരൂർ ജില്ല എന്ന ആവശ്യത്തോടൊപ്പം മൂവാറ്റുപുഴയും സർക്കാരിന്റെ പ്രത്യേക പരിഗണനയിലേക്ക് വരികയാണ്.

പുതിയ ജില്ല നേരിടുന്ന പ്രധാന വെല്ലുവിളികൾ

പുതിയ ജില്ല എന്ന പ്രഖ്യാപനം ആവേശം നൽകുന്നുണ്ടെങ്കിലും പ്രായോഗികമായി ഒട്ടേറെ കടമ്പകൾ അതിജീവിക്കേണ്ടതുണ്ട്. വ്യാവസായിക നഗരമായ കൊച്ചിയുടെ ആനുകൂല്യങ്ങൾ മുൻനിർത്തി പെരുമ്പാവൂർ, പിറവം മേഖലയിലുള്ളവർ എറണാകുളത്ത് തന്നെ തുടരാനാണ് കൂടുതൽ താല്പര്യം കാണിക്കുന്നത്.

ഇതിനുപുറമേ, 36-ഓളം സർക്കാർ വകുപ്പുകളുടെ ജില്ലാ ആസ്ഥാനങ്ങളും അടിസ്ഥാന സൗകര്യങ്ങളും മൂവാറ്റുപുഴയിൽ ഒരുക്കുന്നത് സർക്കാരിന് വലിയ സാമ്പത്തിക ബാധ്യത വരുത്തിവെക്കും. ഇടുക്കിയിലെ ഭാഷാ ന്യൂനപക്ഷ പ്രശ്നങ്ങളും അതിർത്തി തർക്കങ്ങളും പരിഹരിക്കുക എന്നതും എളുപ്പമല്ല.

ALSO READ:

• ഇന്ത്യയിൽ നിന്ന് വിദേശയാത്ര ചെയ്യുന്നവർക്ക് ഫിസിക്കൽ ബോർഡിങ് പാസ് ആവശ്യമില്ല; പുതിയ നിയമവുമായി കേന്ദ്രം
• ഒമാൻ പ്രവാസികളുടെ ശ്രദ്ധയ്ക്ക്: വിമാന ടിക്കറ്റ് ബുക്കിങ്ങിൽ പുതിയ നിയമം, ശ്രദ്ധിക്കുക

മൂവാറ്റുപുഴയുടെ പ്രധാന വികസന സാധ്യതകൾ

വെല്ലുവിളികൾക്കിടയിലും പുതിയ ജില്ലയായി മാറിയാൽ കിഴക്കൻ മേഖലയുടെ വികസനത്തിന് അത് വലിയ വേഗം കൂട്ടും. മൂവാറ്റുപുഴയുടെ പ്രധാന മേന്മകൾ താഴെ പറയുന്നവയാണ്

• മികച്ച അടിസ്ഥാന സൗകര്യങ്ങൾ: ഹൈക്കോടതി കഴിഞ്ഞാൽ സംസ്ഥാനത്തെ ഏറ്റവും വലിയ കോടതി സമുച്ചയം, വിപുലമായ ആരോഗ്യ-വിദ്യാഭ്യാസ സ്ഥാപനങ്ങൾ, സുലഭമായ കുടിവെള്ള ലഭ്യത.
• കാർഷിക-വിനോദസഞ്ചാര പ്രാധാന്യം: ഏഷ്യയിലെ തന്നെ വലിയ പൈനാപ്പിൾ കൃഷി കേന്ദ്രം, മൂന്നാറിലേക്കുള്ള കവാട നഗരം, നെടുമ്പാശ്ശേരി വിമാനത്താവളവുമായുള്ള മികച്ച ഗതാഗത ബന്ധം.

നിലവിൽ വികസന ഫണ്ടുകളുടെ വലിയൊരു പങ്കും കൊച്ചി കേന്ദ്രീകൃത മേഖലകളിലേക്ക് പോകുന്നതിനാൽ മൂവാറ്റുപുഴ, കോതമംഗലം തുടങ്ങിയ മലയോര മേഖലകൾ നേരിടുന്ന വികസനമുരടിപ്പിന് പുതിയ ജില്ലാ രൂപീകരണത്തോടെ ശാശ്വത പരിഹാരമാകുമെന്നാണ് കരുതപ്പെടുന്നത്.

ഗതാഗത ഇടനാഴി

നഗരവികസനത്തിനും അടിസ്ഥാന സൗകര്യ വികസനത്തിനും ആവശ്യമായത്ര ഭൂമി ലഭ്യമാണെന്നതാണ് മൂവാറ്റുപുഴയുടെ ഏറ്റവും വലിയ പ്രത്യേകത. കൊച്ചി-ധനുഷ്കോടി ദേശീയപാതയും (NH 85) പ്രധാന സംസ്ഥാന പാതകളും കടന്നുപോകുന്ന കവലയെന്ന നിലയിൽ പുതിയ ജില്ലാ ആസ്ഥാനം വരുന്നത് മധ്യകേരളത്തിലെ ഗതാഗത കുരുക്കിന് പരിഹാരമാകും.

കൂടാതെ, ഭാവിയിൽ ശബരി റെയിൽവേ പാത മൂവാറ്റുപുഴ വഴി കടന്നുപോകുന്നത് കിഴക്കൻ മേഖലയുടെ വ്യാപാര-ഗതാഗത കുതിപ്പിന് കൂടുതൽ കരുത്ത് പകരും.

മലപ്പുറത്തും പുതിയ ജില്ല വേണമെന്ന് ആവശ്യം (Malappuram new district demand)

മൂവാറ്റുപുഴ ജില്ല എന്ന മുഖ്യമന്ത്രിയുടെ പ്രഖ്യാപനത്തിന് പിന്നാലെ മലപ്പുറം ജില്ല വിഭജിക്കണമെന്ന ആവശ്യവും വീണ്ടും സജീവമാകുകയാണ്. മൂവാറ്റുപുഴ ജില്ല എറണാകുളത്തിന് എത്രത്തോളം അനിവാര്യമാണോ, അതിനേക്കാൾ അനിവാര്യമാണ് മലപ്പുറത്തും ഒരു പുതിയ ജില്ലയെന്ന് താനൂർ എംഎൽഎ പി.കെ. നവാസ് ഫേസ്ബുക്കിൽ കുറിച്ചു.

വലിയ ജനസംഖ്യയുള്ള മലപ്പുറത്ത് ഭരണസൗകര്യത്തിനായി തിരൂർ കേന്ദ്രീകരിച്ച് പുതിയ ജില്ല വേണമെന്ന ആവശ്യത്തിന് ഈ പ്രഖ്യാപനത്തോടെ വീണ്ടും ജീവൻ വെച്ചിരിക്കുകയാണ്.

മുൻകാല പഠന റിപ്പോർട്ടുകളും ഭാവി സാധ്യതകളും

മൂവാറ്റുപുഴ കേന്ദ്രീകരിച്ച് പുതിയ ജില്ല രൂപീകരിക്കുന്നത് സംബന്ധിച്ച് മുൻപ് നടന്ന പഠനങ്ങളെല്ലാം തന്നെ പ്രദേശത്തിന്റെ വികസന സാധ്യതകളെ ശരിവെക്കുന്നതായിരുന്നു. മുൻപ് ഡി. ബാബുപോൾ കമ്മീഷൻ നൽകിയ റിപ്പോർട്ടിൽ ജനസംഖ്യാ അനുപാതവും ഭൂമിശാസ്ത്രപരമായ പ്രത്യേകതകളും കൃത്യമായി അടയാളപ്പെടുത്തിയിരുന്നു.

കൊച്ചി നഗരത്തിലെ ജനസാന്ദ്രത കുറയ്ക്കാനും കിഴക്കൻ മലയോര മേഖലകളിലേക്ക് കൂടുതൽ സർക്കാർ സേവനങ്ങൾ എത്തിക്കാനും ഈ ജില്ലാ രൂപീകരണത്തിലൂടെ സാധിക്കുമെന്നാണ് വിലയിരുത്തപ്പെടുന്നത്.

ALSO READ:

• പ്രവാസികൾക്ക് അനുഗ്രഹമാകുന്ന ‘ ജയ്‌വാൻ കാർഡ്’: എന്താണ് ഗുണങ്ങൾ? എങ്ങനെ അപേക്ഷിക്കാം? എല്ലാമറിയാം
• ഓണം നിവിൻ തൂക്കിയോ?: ‘ബത്‌ലേഹം കുടുംബ യൂണിറ്റ്’ റിവ്യൂ വായിക്കാം…

FAQ

മൂവാറ്റുപുഴ ജില്ലയെക്കുറിച്ച് ഏറ്റവും ഒടുവിൽ പ്രഖ്യാപനം നടത്തിയത് ആരാണ്?

മൂവാറ്റുപുഴയിൽ നടന്ന ചടങ്ങിൽ മുഖ്യമന്ത്രി വി.ഡി. സതീശനാണ് പ്രഖ്യാപനം നടത്തിയത്.

മൂവാറ്റുപുഴ ജില്ലയ്ക്കായി ആദ്യം കമ്മീഷനെ നിയമിച്ചത് ഏത് വർഷമാണ്?

1982-ൽ അന്നത്തെ മുഖ്യമന്ത്രി കെ. കരുണാകരനാണ് ബാബുപോൾ കമ്മീഷനെ നിയമിച്ചത്.

ഏതൊക്കെ പ്രദേശങ്ങൾ ഉൾപ്പെടുത്തിയാണ് പുതിയ ജില്ല നിർദ്ദേശിക്കുന്നത്?

എറണാകുളത്തെ മൂവാറ്റുപുഴ, കോതമംഗലം, പിറവം, പെരുമ്പാവൂരിന്റെ ഭാഗങ്ങൾ, ഇടുക്കിയിലെ തൊടുപുഴ എന്നിവ ഉൾപ്പെടുന്നു.

മൂവാറ്റുപുഴക്കാർ പ്രധാനമായും ഉന്നയിക്കുന്ന പരാതി എന്താണ്?

വികസന ഫണ്ടുകൾ കൊച്ചി കേന്ദ്രീകൃതമായി പോകുന്നതിനാൽ കിഴക്കൻ മേഖലകൾ വികസനമുരടിപ്പ് നേരിടുന്നു എന്നതാണ്.

പുതിയ ജില്ലാ രൂപീകരണത്തിന് മുന്നിലുള്ള പ്രധാന തടസ്സം എന്താണ്?

പെരുമ്പാവൂർ, പിറവം തുടങ്ങിയ പ്രദേശങ്ങൾക്ക് എറണാകുളത്തോടുള്ള താല്പര്യവും ഭാരിച്ച സാമ്പത്തിക ചെലവുമാണ്.

മറ്റ് ഏതെങ്കിലും പ്രദേശങ്ങൾ പുതിയ ജില്ലയ്ക്കായി ഉന്നയിക്കപ്പെടുന്നുണ്ടോ?

അതെ, മുസ്ലിം ലീഗ് ശക്തമായി ആവശ്യപ്പെടുന്ന മലബാറിലെ തിരൂർ ജില്ലയും പരിഗണനയിലുണ്ട്.

മൂവാറ്റുപുഴയുടെ പ്രധാന വികസന മേന്മകൾ എന്തൊക്കെയാണ്?

സുലഭമായ കുടിവെള്ളം, പൈനാപ്പിൾ കൃഷി കേന്ദ്രം, വലിയ കോടതി സമുച്ചയം, മൂന്നാറിലേക്കുള്ള കവാടം എന്നിവയാണ് പ്രധാന മേന്മകൾ.

English Summary: The long standing demand for a new Muvattupuzha district has gained traction following Chief Minister VD Satheesan’s announcement to form a new delimitation commission. While the move aims to boost eastern Kerala’s development, it faces economic challenges, border realignments, and growing demands for a new district in Malappuram.