യുഎഇയിലെ മികച്ച ബാങ്കുകൾ ഏതൊക്കെ? സേവനങ്ങൾ, പലിശ, മറ്റു ആനുകൂല്യങ്ങൾ അറിയാം ( ഗൈഡ് )

Published: Saturday, 27 June 2026 , at 8:47 am| Dubai | Edited: Saturday, 27 June 2026 , at 8:54 am

നിങ്ങൾ യുഎഇയിൽ പുതിയതായി എത്തിയ പ്രവാസിയോ അല്ലെങ്കിൽ നിലവിലുള്ള ബാങ്ക് അക്കൗണ്ട് മാറ്റാൻ ആഗ്രഹിക്കുന്ന ആളോ ആണെങ്കിൽ, കൃത്യമായ ബാങ്കിങ് പങ്കാളിയെ തിരഞ്ഞെടുക്കുന്നത് വളരെ പ്രധാനമാണ്. യുഎഇ സെൻട്രൽ ബാങ്കിന്റെ ശക്തമായ മേൽനോട്ടത്തിൽ പ്രവർത്തിക്കുന്ന ഈ വർഷത്തെ (2026) ഏറ്റവും മികച്ച ബാങ്കുകളെക്കുറിച്ചും (Best UAE Banks 2026) അവ നൽകുന്ന സേവനങ്ങളെക്കുറിച്ചും അറിയാം…

ALSO READ: ‘

• ടൂറിസ്റ്റ് ഐഡന്റിറ്റി’ പദ്ധതി: ഇനി മിനിറ്റുകൾക്കുള്ളിൽ പ്രവാസികൾക്കും സന്ദർശകർക്കും യുഎഇ ബാങ്ക് അക്കൗണ്ട് തുടങ്ങാം
• കള്ളപ്പണം വെളുപ്പിക്കൽ തടയാൻ പുതിയ നീക്കവുമായി യുഎഇ സെൻട്രൽ ബാങ്ക്: വെർച്വൽ ആസ്തികൾ നിരീക്ഷിക്കും
• ബാങ്ക് ഇടപാടുകളിൽ വാട്‌സാപ്പിന് വിലക്ക്: സുപ്രധാന തീരുമാനവുമായി യുഎഇ സെൻട്രൽ ബാങ്ക്

യുഎഇയിലെ പ്രധാന ബാങ്കുകൾ

കൂടുതൽ ശാഖകളും എടിഎമ്മുകളുമുള്ള, വലിയ ആസ്തിയുള്ള യുഎഇയിലെ പ്രധാന ലോക്കൽ ബാങ്കുകൾ ഏതെല്ലാമെന്ന് നോക്കാം.

ഫസ്റ്റ് അബുദാബി ബാങ്ക് (FAB)

ആസ്തിയുടെ കാര്യത്തിൽ യുഎഇയിലെയും മിഡിൽ ഈസ്റ്റിലെയും ഏറ്റവും വലിയ ബാങ്കാണ് ഫസ്റ്റ് അബുദാബി ബാങ്ക് (FAB). അബുദാബി ആസ്ഥാനമായി പ്രവർത്തിക്കുന്ന ഈ ബാങ്കിന് യുഎഇയിലുടനീളം 80-ലധികം ശാഖകളും 600-ൽ കൂടുതൽ എടിഎമ്മുകളുമുണ്ട്. വലിയ ബിസിനസ്സ് അക്കൗണ്ടുകൾക്കും നിക്ഷേപങ്ങൾക്കും ഇത് സുരക്ഷിതമാണ്.

• ഉയർന്ന ലാഭം: ചില പ്രത്യേക അക്കൗണ്ടുകൾക്ക് 5.25% വരെ പലിശ നിരക്ക് ഇവർ നൽകുന്നുണ്ട്.
• പ്രത്യേക ആനുകൂല്യങ്ങൾ: ‘FAB എലൈറ്റ്’ അക്കൗണ്ടുകൾ വഴി സൗജന്യ വേർഡ് മാസ്റ്റർകാർഡ് ഡെബിറ്റ് കാർഡുകളും, ലോകത്തെവിടെ നിന്നും ഫീസില്ലാതെ എടിഎമ്മിൽ നിന്ന് പണം പിൻവലിക്കാനുള്ള സൗകര്യവും ലഭിക്കും.
• ബിസിനസ്സ് സഹായം: വലിയ കമ്പനികൾക്ക് ആവശ്യമായ പണമിടപാടുകൾക്കും വിദേശ കറൻസി മാറ്റങ്ങൾക്കും മികച്ച സംവിധാനങ്ങൾ ഇവിടെയുണ്ട്.

എമിറേറ്റ്സ് എൻബിഡി (Emirates NBD)

ദുബായിലും മറ്റ് എമിറേറ്റുകളിലും ജോലി ചെയ്യുന്ന ശമ്പളക്കാരായ പ്രൊഫഷണലുകൾക്ക് ഏറ്റവും കൂടുതൽ ഉപകാരപ്പെടുന്ന ബാങ്കാണിത്. ഇതിന് നൂറിലധികം ശാഖകളും 500-ലധികം എടിഎമ്മുകളും ഉള്ളതുകൊണ്ട് എവിടെപ്പോയാലും ഇവരുടെ സേവനം എളുപ്പത്തിൽ കിട്ടും.

• ENBD X മൊബൈൽ ആപ്പ്: മൊബൈൽ റീച്ചാർജ് ചെയ്യാനും, ബില്ലുകൾ അടയ്ക്കാനും, ചെലവുകൾ കൃത്യമായി അറിയാനും സഹായിക്കുന്ന വളരെ എളുപ്പമുള്ള സൂപ്പർ ആപ്പാണിത്.
• DirectRemit സൗകര്യം: ഒരു രൂപ പോലും ഫീസ് കൊടുക്കാതെ, മികച്ച എക്സ്ചേഞ്ച് റേറ്റിൽ ഇന്ത്യയിലേക്ക് തൽക്ഷണം പണം അയക്കാൻ ഈ ആപ്പ് വഴി സാധിക്കും.
• മറ്റ് ഓഫറുകൾ: കുറഞ്ഞ ശമ്പളമുള്ളവർക്കും അക്കൗണ്ട് തുറക്കാം. കൂടാതെ 2.14% മുതൽ ആരംഭിക്കുന്ന കുറഞ്ഞ പലിശയിൽ ഭവന വായ്പകളും നല്ല ക്രെഡിറ്റ് കാർഡ് ഓഫറുകളും ഇവർക്കുണ്ട്.

അബുദാബി കൊമേഴ്സ്യൽ ബാങ്ക് (ADCB)

ദൈനംദിന ബാങ്കിങ് കാര്യങ്ങൾക്കൊപ്പം തങ്ങളുടെ സമ്പാദ്യം നല്ല രീതിയിൽ നിക്ഷേപിക്കാൻ ആഗ്രഹിക്കുന്ന പ്രവാസികൾക്ക് പറ്റിയ ബാങ്കാണ് എഡിസിബി.

• പ്രവാസി ഹെൽപ്പ് ഡെസ്ക്: യുഎഇയിൽ പുതുതായി എത്തിയ പ്രവാസികളെ അക്കൗണ്ട് കാര്യങ്ങളിൽ സഹായിക്കാൻ പ്രത്യേക കസ്റ്റമർ കെയർ ജീവനക്കാർ ഇവിടുണ്ട്.
• നിക്ഷേപ സഹായം: നിങ്ങളുടെ പണം എവിടെ നിക്ഷേപിക്കണം എന്നതിനെക്കുറിച്ച് കൃത്യമായ ഉപദേശങ്ങളും ഗൈഡൻസും ഇവർ തരും.
• നല്ല ലാഭം: സാധാരണ സേവിങ്സ് അക്കൗണ്ടുകൾക്ക് 2.25% വരെ പലിശ നിരക്ക് ഇവർ നൽകുന്നുണ്ട്.

യുഎഇയിലെ മികച്ച സേവിങ്സ് അക്കൗണ്ടുകൾ (Best Savings Account in UAE)

നമുക്ക് അനുയോജ്യമായ ഒരു സേവിങ്സ് അക്കൗണ്ട് തിരഞ്ഞെടുക്കുമ്പോൾ വർഷത്തിൽ കിട്ടുന്ന പലിശ എത്രയാണ്, മാസാമാസം അക്കൗണ്ടിൽ എത്ര രൂപ മിനിമം സൂക്ഷിക്കണം, പണം പിൻവലിക്കുന്നതിന് പരിധിയുണ്ടോ എന്നിവ നോക്കണം. വിപണിയിൽ മത്സരം കടുത്തതുകൊണ്ട് പല ബാങ്കുകളും ഇപ്പോൾ നല്ല ഓഫറുകൾ നൽകുന്നുണ്ട്.

കൂടുതൽ ലാഭം തരുന്ന പ്രധാന അക്കൗണ്ടുകൾ

• FAB iSave അക്കൗണ്ട്: ഇതൊരു സീറോ ബാലൻസ് അക്കൗണ്ടാണ് (അതായത് അക്കൗണ്ടിൽ പൈസ ഇല്ലെങ്കിലും ഫൈൻ അടിക്കേണ്ടി വരില്ല). ഇതിൽ സാധാരണയായി 3.25% പലിശ കിട്ടും. പുതിയ നിക്ഷേപങ്ങൾക്ക് ഓഫർ കാലയളവിൽ 4.00% വരെ പലിശയും തരുന്നുണ്ട്.
• RAKBANK സേവിങ്സ് അക്കൗണ്ട്: അക്കൗണ്ട് തുടങ്ങി ആദ്യത്തെ 3 മാസത്തേക്ക് 6.25% വരെ വലിയ പലിശ നിരക്കും ഒപ്പം നല്ല കാഷ്ബാക്ക് ഓഫറുകളും ഇവർ നൽകുന്നു.
• നാഷണൽ ബാങ്ക് ഓഫ് ഫുജൈറ (NBF) മാക്സ് സേവർ: മിനിമം ബാലൻസ് വെക്കേണ്ടതില്ല. ദിർഹത്തിന് 2.50%-ഉം യുഎസ് ഡോളറിന് 2.00%-ഉം പലിശ കിട്ടും. എന്നാൽ പണം കൂടുതൽ സമ്പാദിക്കാൻ സഹായിക്കുന്നതിനായി മാസത്തിൽ ഒരു തവണ മാത്രമേ ഇതിൽ നിന്ന് പണം പിൻവലിക്കാൻ അനുവാദമുള്ളൂ.

ALSO READ:

• വായ്പ വേണോ? കുറഞ്ഞ പലിശയിൽ പ്രവാസികൾക്കായി യുഎഇ ബാങ്കുകളുടെ വമ്പൻ ഓഫറുകൾ

ഡിജിറ്റൽ സ്മാർട്ട് ബാങ്കുകൾ ( Digital Banks)

കുറഞ്ഞ ചാർജുകളും, മൊബൈൽ വഴി തൽക്ഷണം അക്കൗണ്ട് തുറക്കാനുള്ള സൗകര്യവും നൽകുന്ന പുതിയ തലമുറ ആപ്പ് ബാങ്കുകൾ.

വിയോ ബാങ്ക് (Wio Bank)

ബാങ്കിൽ നേരിട്ട് പോകാതെ മൊബൈൽ ആപ്പ് വഴി മാത്രം പ്രവർത്തിക്കുന്ന ഒരു സൂപ്പർ ഡിജിറ്റൽ ബാങ്കാണിത്. സാധാരണക്കാർക്കായി ‘Wio Personal’ ആപ്പും, ബിസിനസ്സുകാർക്കായി ‘Wio Business’ ആപ്പും ഇവരുണ്ടാക്കിയിട്ടുണ്ട്. പഴയതുപോലെ ബാങ്കിൽ കയറിയിറങ്ങി സമയം കളയാതെ കാര്യങ്ങൾ വേഗത്തിലാക്കാൻ ഇത് സഹായിക്കും.

• വേഗത്തിൽ ബിസിനസ്സ് അക്കൗണ്ട്: ഫ്രീലാൻസ് ജോലി ചെയ്യുന്നവർക്കും ചെറിയ ബിസിനസ്സുകാർക്കും തങ്ങളുടെ മൊബൈൽ വഴി തന്നെ ദിവസങ്ങൾക്കുള്ളിൽ അക്കൗണ്ട് റെഡിയാക്കി എടുക്കാം.
• ഉപയോഗിക്കാൻ എളുപ്പം: പണം സൂക്ഷിക്കാനും നാട്ടിലേക്ക് അയക്കാനും വളരെ ലളിതമായ മൊബൈൽ സ്ക്രീൻ ഡിസൈനാണ് ഇതിനുള്ളത്.
• നല്ല പലിശ നിരക്ക്: നമ്മുടെ പണം ലോക്ക് ചെയ്തു വെക്കാതെ തന്നെ സേവിങ്സിന് നല്ല പലിശ ഇവർ തരുന്നുണ്ട്.

ലിവ് ബാങ്ക് (Liv. by Emirates NBD)

ലിവ് (Liv.) അക്കൗണ്ട് തുടങ്ങാൻ ഒരിടത്തും നടക്കേണ്ടതില്ല. നിങ്ങളുടെ മൊബൈൽ വഴി മിനിറ്റുകൾക്കുള്ളിൽ ഇത് ചെയ്യാം. മാസാമാസം ശമ്പളം ഇതിലേക്ക് മാറ്റുകയോ അല്ലെങ്കിൽ ആപ്പ് വഴി പണമിടപാടുകൾ നടത്തുകയോ ചെയ്താൽ ഉയർന്ന പലിശ സ്വന്തമാക്കാം.

• ലിവ് ഗോൾ അക്കൗണ്ട്: നിങ്ങളുടെ മാസശമ്പളം ഈ ആപ്പിലേക്ക് നേരിട്ട് വരികയാണെങ്കിൽ സമ്പാദ്യത്തിന് 4.00% വരെ പലിശ കിട്ടും.
• മിനിമം ബാലൻസ് പേടി വേണ്ട: അക്കൗണ്ടിൽ മിനിമം ബാലൻസ് ഇല്ലെങ്കിലും ചാർജുകൾ ഈടാക്കില്ല എന്ന വലിയൊരു ഗുണം ഇതിനുണ്ട്.
• ലൈഫ്‌സ്റ്റൈൽ ഡിസ്കൗണ്ടുകൾ: യുഎഇയിലെ നല്ല റസ്റ്റോറന്റുകളിൽ പോയി ഭക്ഷണം കഴിക്കുമ്പോഴും, സിനിമ തിയേറ്ററുകളിലും, വിമാന ടിക്കറ്റ് എടുക്കുമ്പോഴും വലിയ ഡിസ്കൗണ്ടുകൾ ഈ ആപ്പ് വഴി ലഭിക്കും.

പലിശരഹിത ഇസ്ലാമിക് ബാങ്കുകൾ (UAE Islamic Banking)

ഇസ്ലാമിക് ബാങ്കുകൾ പ്രവർത്തിക്കുന്നത് പലിശ ഈടാക്കാതെ, സുതാര്യമായ ലാഭവിഹിതം (Mudarabah) പങ്കുവെച്ചുകൊണ്ടാണ്. ഇത് മുസ്ലിം സഹോദരങ്ങൾക്ക് മാത്രമല്ല, തങ്ങളുടെ പണം നല്ല രീതിയിൽ കൈകാര്യം ചെയ്യാൻ ആഗ്രഹിക്കുന്ന ഏതൊരു പ്രവാസിക്കും ഉപയോഗിക്കാം.

ദുബായ് ഇസ്ലാമിക് ബാങ്ക് (DIB)

ലോകത്തിലെ തന്നെ ആദ്യത്തെ ഇസ്ലാമിക് ബാങ്കാണിത്. പ്രവാസികൾക്ക് ദൈനംദിന കാര്യങ്ങൾക്ക് ഉപയോഗിക്കാൻ പറ്റിയ ഏറ്റവും നല്ലൊരു ബാങ്കാണിത്.

• പ്രവാസികൾക്ക് എളുപ്പം: കൂടുതൽ സർവീസ് ചാർജുകൾ ഇല്ലാതെ തന്നെ പ്രവാസികൾക്ക് അന്താരാഷ്ട്ര ഡെബിറ്റ് കാർഡുകളോടെ അക്കൗണ്ട് തുറക്കാം.
• പലിശരഹിത ഭവന വായ്പ: പലിശയില്ലാത്ത രീതിയിൽ വീട് വാങ്ങാൻ ലോൺ എടുക്കാൻ ആഗ്രഹിക്കുന്നവർക്ക് ഡിഐബി നല്ലൊരു ചോയ്‌സ് ആണ്.
• അൽ ഇസ്ലാമി കറന്റ് അക്കൗണ്ട്: പ്രതിമാസ ചാർജുകൾ ഇല്ലാതെ തന്നെ ചെക്ക് ബുക്കും എടിഎം കാർഡും ലഭിക്കുന്ന നല്ലൊരു സാധാരണ അക്കൗണ്ടാണിത്.

അബുദാബി ഇസ്ലാമിക് ബാങ്ക് (ADIB)

വിശ്വാസ്യതയും ആധുനിക മൊബൈൽ ബാങ്കിങ് സൗകര്യങ്ങളും ഒന്നിച്ച് കൊണ്ടുപോകുന്ന ബാങ്കാണിത്.

• എത്തിക്കൽ സേവിങ്സ്: കമേഴ്‌സ്യൽ പലിശയ്ക്ക് പകരം ബാങ്കിന്റെ ബിസിനസ്സ് വളർച്ചയ്ക്കനുസരിച്ചുള്ള ലാഭവിഹിതമാണ് നിക്ഷേപങ്ങൾക്ക് തരിക.
• അക്കൗണ്ട്: എമിറേറ്റ്സ് ഐഡി ഉപയോഗിച്ച് മൊബൈൽ ആപ്പിലൂടെ തന്നെ ഉടൻ തന്നെ അക്കൗണ്ട് ഓപ്പൺ ചെയ്യാം.
• ശൃംഖല: യുഎഇയിലുടനീളം 70-ലധികം ശാഖകളും 350-ലധികം എടിഎമ്മുകളും ഇവർക്കുണ്ട്.

യുഎഇയിലെ അന്താരാഷ്ട്ര ബാങ്കുകൾ

പല രാജ്യങ്ങളിലേക്ക് സ്ഥിരമായി യാത്ര ചെയ്യുന്നവർക്കും നാട്ടിലേക്കും മറ്റിടങ്ങളിലേക്കും എളുപ്പത്തിൽ വലിയ തുകകൾ മാറ്റേണ്ടവർക്കും അന്താരാഷ്ട്ര ബാങ്കുകൾ ഉപയോഗിക്കാം.

• HSBC മിഡിൽ ഈസ്റ്റ്: ദുബായിൽ 50 വർഷത്തിലധികമായി ഇവരുണ്ട്. പല രാജ്യങ്ങളിലുള്ള നിങ്ങളുടെ എച്ച്എസ്ബിസി അക്കൗണ്ടുകൾ തമ്മിൽ ഒന്നിപ്പിക്കാനും സൗജന്യമായി പണം കൈമാറാനും ഇത് സഹായിക്കും.
• സിറ്റിബാങ്ക് (Citibank N.A): വിവിധ കറൻസികളിൽ അക്കൗണ്ട് സൂക്ഷിക്കാനും വിദേശത്തേക്ക് സുരക്ഷിതമായി വലിയ തുകകൾ അയക്കാനും പറ്റിയ പ്രമുഖ അമേരിക്കൻ ബാങ്ക്.
• സ്റ്റാൻഡേർഡ് ചാർട്ടേഡ് യുഎഇ: മികച്ച വെൽത്ത് അഡ്വൈസറി സേവനങ്ങളും നല്ല ഫോറിൻ എക്സ്ചേഞ്ച് നിരക്കുകളും നൽകുന്ന പ്രമുഖ ബ്രിട്ടീഷ് ബാങ്ക്.

ബാങ്കുകൾ ഈടാക്കുന്ന പ്രധാന ചാർജുകൾ (ശ്രദ്ധിക്കേണ്ട കാര്യങ്ങൾ)

ബാങ്കിൽ പണം സൂക്ഷിക്കുമ്പോൾ അനാവശ്യമായി പൈസ നഷ്ടപ്പെടാതിരിക്കാൻ താഴെ പറയുന്ന കാര്യങ്ങൾ അറിഞ്ഞിരിക്കുക

• മിനിമം ബാലൻസ് ചാർജ്: മിക്ക വലിയ ബാങ്കുകളും അക്കൗണ്ടിൽ പ്രതിമാസം 3,000 മുതൽ 5,000 ദിർഹം വരെ മിനിമം ബാലൻസ് ആവശ്യപ്പെടാറുണ്ട്. ഇതിലും കുറഞ്ഞുപോയാൽ മാസാമാസം 25 ദിർഹം മുതൽ 75 ദിർഹം വരെ നിങ്ങളുടെ അക്കൗണ്ടിൽ നിന്നും പെനാൽറ്റിയായി അവർ ഈടാക്കും.
• മറ്റ് ബാങ്ക് എടിഎം ചാർജുകൾ: നിങ്ങളുടെ ബാങ്കിന്റെ അല്ലാത്ത മറ്റ് ബാങ്ക് എടിഎമ്മുകളിൽ നിന്ന് പണം പിൻവലിക്കുമ്പോൾ ചെറിയൊരു ചാർജ് വരാം. എന്നാൽ വിദേശത്ത് പോയി കാർഡ് ഉപയോഗിച്ച് പണം പിൻവലിച്ചാൽ വലിയ തുക ചാർജ് വരും.
• കാർഡ് എക്സ്ചേഞ്ച് റേറ്റ് (FX Markup): യുഎഇയിലെ കാർഡുകൾ നാട്ടിൽ കൊണ്ടുവന്നോ മറ്റ് രാജ്യങ്ങളിൽ പോയോ ഉപയോഗിക്കുമ്പോൾ സാധാരണ നിരക്കിനേക്കാൾ 1.5% മുതൽ 3% വരെ അധിക ചാർജ് ബാങ്കുകൾ ഈടാക്കും.
• അക്കൗണ്ട് നേരത്തെ ക്ലോസ് ചെയ്യൽ: അക്കൗണ്ട് തുടങ്ങി 6 മാസമോ ഒരു വർഷമോ ആകുന്നതിന് മുൻപ് അത് ക്ലോസ് ചെയ്യുകയാണെങ്കിൽ ചെറിയൊരു അഡ്മിനിസ്ട്രേഷൻ ഫീ കൊടുക്കേണ്ടി വരും.

ബാങ്ക് അക്കൗണ്ട് തുറക്കാൻ എന്തൊക്കെ വേണം?

ഔദ്യോഗിക വെബ്‌സൈറ്റായ ICP (ഫെഡറൽ അതോറിറ്റി ഫോർ ഐഡന്റിറ്റി, സിറ്റിസൺഷിപ്പ്) വ്യക്തമാക്കുന്ന നിയമങ്ങൾ പ്രകാരം ആവശ്യമായ രേഖകൾ താഴെ പറയുന്നവയാണ്:

താമസ വിസയുള്ളവർക്ക് (UAE Residents)

നിങ്ങൾക്ക് വാലിഡ് വിസ ഉണ്ടെങ്കിൽ മൊബൈൽ ആപ്പ് വഴിയോ ബാങ്കിൽ നേരിട്ട് പോയോ താഴെ പറയുന്ന രേഖകൾ നൽകി അക്കൗണ്ട് തുറക്കാം:

• നിങ്ങളുടെ ഒറിജിനൽ പാസ്‌പോർട്ടും വിസ പേജും.
• ഒറിജിനൽ എമിറേറ്റ്സ് ഐഡി (Emirates ID).
• നിങ്ങളുടെ കമ്പനി നൽകുന്ന സാലറി സർട്ടിഫിക്കറ്റ് (Salary Certificate).
• നിങ്ങൾ താമസിക്കുന്ന വീടിന്റെ വാടകക്കരാർ (Ejari) അല്ലെങ്കിൽ കറന്റ്/വെള്ളം ബില്ലുകൾ.

വിസിറ്റ് വിസയിൽ ഉള്ളവർക്ക്

താമസ വിസയില്ലാത്തവർക്ക് സാധാരണ കറന്റ് അക്കൗണ്ടുകൾ തുറക്കാൻ കഴിയില്ലെങ്കിലും ചില നിബന്ധനകളോടെ സേവിങ്സ് അക്കൗണ്ട് തുറക്കാം. അതിനായി:

• ഒറിജിനൽ പാസ്‌പോർട്ടും യുഎഇയിലേക്ക് പ്രവേശിച്ച സ്റ്റാമ്പും വേണം.
• നിങ്ങളുടെ നാട്ടിലെ ബാങ്കിന്റെ കഴിഞ്ഞ 3 അല്ലെങ്കിൽ 6 മാസത്തെ ബാങ്ക് സ്റ്റേറ്റ്‌മെന്റ് കാണിക്കണം.
• നിങ്ങളുടെ വരുമാനത്തിന്റെ തെളിവ് ഹാജരാക്കണം.
• കൂടാതെ ബാങ്ക് അനുസരിച്ച് അക്കൗണ്ടിൽ എപ്പോഴും 20,000 ദിർഹം മുതൽ 1,00,000 ദിർഹം വരെ വലിയൊരു തുക മിനിമം ബാലൻസ് ആയി സൂക്ഷിക്കേണ്ടി വരും.

നിങ്ങൾ ചെയ്യേണ്ടത്

• ശമ്പളം എത്രയെന്ന് ഉറപ്പാക്കുക: നിങ്ങളുടെ അപ്പോയിന്റ്മെന്റ് ലെറ്ററിലോ ലേബർ കാർഡിലോ ഉള്ള കൃത്യമായ ബേസിക് ശമ്പളം എത്രയെന്ന് നോക്കുക. കാരണം, കൃത്യമായി സാലറി അക്കൗണ്ടിലേക്ക് വരുന്നവർക്ക് പല ബാങ്കുകളും മിനിമം ബാലൻസ് വെക്കണമെന്ന നിബന്ധനയും മറ്റ് ചാർജുകളും പൂർണ്ണമായി ഒഴിവാക്കി തരാറുണ്ട്.
• ആപ്പുകൾ നോക്കുക: മുകളിൽ പറഞ്ഞവയിൽ നിങ്ങൾക്ക് ഏറ്റവും അനുയോജ്യമെന്ന് തോന്നിയ ബാങ്കിന്റെ ഔദ്യോഗിക ആപ്പ് പ്ലേസ്റ്റോറിൽ നിന്നോ ആപ്പ് സ്റ്റോറിൽ നിന്നോ ഡൗൺലോഡ് ചെയ്ത് നിങ്ങളുടെ എമിറേറ്റ്സ് ഐഡി ഉപയോഗിച്ച് വീട്ടിലിരുന്ന് തന്നെ അക്കൗണ്ട് എടുക്കാൻ ശ്രമിക്കുക.

ALSO READ:

• 1000 ദിർഹം മുതൽ നിക്ഷേപിക്കാം, ലാഭവും നേടാം: യുഎഇയിൽ പ്രവാസികൾക്കായി വമ്പൻ നിക്ഷേപപദ്ധതി, കൂടുതലറിയാം…

FAQs

യുഎഇയിൽ സേവിങ്സ് അക്കൗണ്ടിൽ എത്ര രൂപ മിനിമം ബാലൻസ് വേണം?

സാധാരണ ബാങ്കുകളിൽ 3,000 മുതൽ 5,000 ദിർഹം വരെ വേണം. എന്നാൽ ‘Liv’, ‘Wio’ പോലുള്ള ഡിജിറ്റൽ ബാങ്കുകളിൽ സീറോ ബാലൻസിൽ അക്കൗണ്ട് ഉപയോഗിക്കാം.

വിസിറ്റ് വിസയിൽ ഉള്ളവർക്ക് ദുബായിൽ അക്കൗണ്ട് എടുക്കാമോ?

അതെ, എടുക്കാം. പക്ഷേ അവർക്ക് ചെക്ക് ബുക്കോ കറന്റ് അക്കൗണ്ടോ കിട്ടില്ല. വലിയ തുക മിനിമം ബാലൻസ് വെച്ചുകൊണ്ട് സേവിങ്സ് അക്കൗണ്ട് മാത്രമേ കിട്ടൂ.

ഡിജിറ്റൽ ബാങ്കുകൾക്ക് നേരിട്ട് ശാഖകൾ ഉണ്ടോ?

ഇല്ല, ഇവർക്ക് നേരിട്ട് ശാഖകൾ ഉണ്ടാകില്ല. എല്ലാം മൊബൈൽ ആപ്പ് വഴിയാണ്. എന്നാൽ എന്തെങ്കിലും അടിയന്തിര ആവശ്യത്തിന് ഇവരുടെ മാതൃ ബാങ്കുകളുടെ (ഉദാഹരണത്തിന് Liv ബാങ്കിനായി Emirates NBD) ശാഖകളെ സമീപിക്കാം.

മുസ്ലിം അല്ലാത്തവർക്ക് ഇസ്ലാമിക് ബാങ്കിൽ അക്കൗണ്ട് എടുക്കാമോ?

തീർച്ചയായും എടുക്കാം. പലിശയില്ലാത്ത നല്ല രീതിയിലുള്ള ബാങ്കിങ് ആഗ്രഹിക്കുന്ന ജാതി-മത ഭേദമന്യേ ഏതൊരു പ്രവാസിക്കും ഇസ്ലാമിക് ബാങ്ക് അക്കൗണ്ടുകൾ ഉപയോഗിക്കാം.

അക്കൗണ്ടിൽ മിനിമം ബാലൻസ് കുറഞ്ഞുപോയാൽ എന്ത് സംഭവിക്കും?

ബാങ്കുകൾ നിങ്ങളുടെ അക്കൗണ്ടിൽ അവശേഷിക്കുന്ന പണത്തിൽ നിന്നും മാസാമാസം 25 ദിർഹം മുതൽ 75 ദിർഹം വരെ പിഴയായി മുറിച്ചെടുക്കും.

English Summary: Finding the right financial platform among the Best UAE Banks 2026 is crucial for expats and residents. This comprehensive guide highlights traditional heavyweights, digital neo-banks, and Shariah compliant options, while outlining key maintenance fees and required legal documentation to ensure seamless everyday banking and cross border remittances.