Published: Thursday, 7 May 2026, at 1:20 pm| Dubai | Edited: Thursday, 7 May 2026, at 2:20 pm
ദുബൈ: വരുംദിവസങ്ങളിൽ യുഎഇയിൽ താപനില ക്രമാനുഗതമായി വർധിക്കുമെന്ന് ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചു (UAE Weather Update). കടുത്ത ചൂടിനൊപ്പം രാജ്യത്തിന്റെ വിവിധ ഭാഗങ്ങളിൽ ശക്തമായ കാറ്റിനും പൊടിക്കാറ്റിനും സാധ്യതയുണ്ട്. വരും ദിവസങ്ങളിൽ ഉൾപ്രദേശങ്ങളിൽ താപനില 45 ഡിഗ്രി സെൽഷ്യസ് വരെ ഉയർന്നേക്കുമെന്നാണ് കണക്കുകൂട്ടൽ.
തീരദേശ മേഖലകളിൽ അന്തരീക്ഷത്തിലെ ഈർപ്പത്തിന്റെ അളവ് വർധിക്കുന്നത് സാധാരണ ജീവിതത്തെ ബാധിച്ചേക്കാം. നിലവിലെ ഉപരിതല മർദ്ദ വ്യതിയാനങ്ങളാണ് ഈ കാലാവസ്ഥാ മാറ്റത്തിന് പ്രധാന കാരണമെന്ന് വിദഗ്ധർ ചൂണ്ടിക്കാട്ടുന്നു.
ALSO READ: ബലിപെരുന്നാൾ മേയ് 27ന്?: ദുബായിൽ ബലിമൃഗങ്ങളുടെ നിരക്ക് പ്രഖ്യാപിച്ചു
ഗ്ലോബൽ വില്ലേജ് സാധാരണ നിലയിൽ പ്രവർത്തിക്കും: 99 ദിർഹത്തിന് പരിധിയില്ലാത്ത വിനോദങ്ങളുമായി പുതിയ പാസ്
താപനില 45 ഡിഗ്രി കടക്കും
രാജ്യത്തിന്റെ ഉൾനാടൻ പ്രദേശങ്ങളിൽ ചൂട് കഠിനമാകാനാണ് സാധ്യത. ഇന്ന് പൊതുവെ തെളിഞ്ഞ കാലാവസ്ഥയായിരിക്കുമെങ്കിലും ഉൾപ്രദേശങ്ങളിൽ താപനില 40 ഡിഗ്രി സെൽഷ്യസ് വരെ എത്തിയേക്കും. തീരദേശങ്ങളിൽ രാത്രിയിലും പുലർച്ചെയും ഈർപ്പത്തിന്റെ അളവ് 85 ശതമാനം വരെയാകാൻ സാധ്യതയുണ്ട്. ഇത് ജനങ്ങൾക്ക് അസ്വസ്ഥതയുണ്ടാക്കിയേക്കാം. മണിക്കൂറിൽ 35 കിലോമീറ്റർ വേഗതയിൽ വീശുന്ന കാറ്റ് വരുംദിവസങ്ങളിൽ കൂടുതൽ ശക്തമാകും. വാരാന്ത്യത്തോടെ കാറ്റിന്റെ വേഗത 40 കിലോമീറ്ററായി ഉയരുമെന്നും റിപ്പോർട്ടുകൾ സൂചിപ്പിക്കുന്നു.
ശനി, ഞായർ ദിവസങ്ങളിൽ തുറസ്സായ സ്ഥലങ്ങളിൽ ശക്തമായ പൊടിക്കാറ്റിന് സാധ്യതയുണ്ടെന്നാണ് എൻസിഎം നൽകുന്ന മുന്നറിയിപ്പ്. പൊടിക്കാറ്റ് ദൂരക്കാഴ്ചയെ കാര്യമായി ബാധിക്കാൻ സാധ്യതയുള്ളതിനാൽ വാഹനയാത്രക്കാർ അതീവ ജാഗ്രത പാലിക്കണം. വെളിച്ചം കുറവുള്ള സമയങ്ങളിൽ വാഹനമോടിക്കുന്നവർ വേഗത കുറയ്ക്കാനും സുരക്ഷാ മാനദണ്ഡങ്ങൾ പാലിക്കാനും ശ്രദ്ധിക്കണം. മണൽക്കാറ്റ് ശ്വസന സംബന്ധമായ പ്രശ്നമുള്ളവർക്ക് പ്രയാസമുണ്ടാക്കിയേക്കാം എന്നതിനാൽ അനാവശ്യമായി പുറത്തിറങ്ങുന്നത് ഒഴിവാക്കുന്നതാണ് നല്ലത്.
ആരോഗ്യ സുരക്ഷയ്ക്കായി ശ്രദ്ധിക്കേണ്ട കാര്യങ്ങൾ
താപനില ഉയരുന്ന സാഹചര്യത്തിൽ ആരോഗ്യ കാര്യങ്ങളിൽ വലിയ ശ്രദ്ധ ആവശ്യമാണ്. കടുത്ത ചൂടിൽ നിന്ന് രക്ഷനേടാൻ ശ്രദ്ധിക്കേണ്ട കാര്യങ്ങൾ എന്തൊക്കെയാണെന്ന് നോക്കാം..
- ദാഹം തോന്നിയില്ലെങ്കിലും കൃത്യമായ ഇടവേളകളിൽ ധാരാളം വെള്ളം കുടിക്കുക.
- പഴങ്ങൾ, പച്ചക്കറികൾ എന്നിവ ഭക്ഷണത്തിൽ ഉൾപ്പെടുത്തുകയും ഉപ്പ്, ചായ, കാപ്പി എന്നിവയുടെ ഉപയോഗം കുറയ്ക്കുകയും ചെയ്യുക.
- ഉച്ചയ്ക്ക് 12 മണി മുതൽ 3 മണി വരെയുള്ള സമയത്ത് നേരിട്ട് വെയിൽ ഏൽക്കാതിരിക്കാൻ ശ്രദ്ധിക്കുക.
- പുറത്തിറങ്ങുമ്പോൾ കുടയോ തൊപ്പിയോ ധരിക്കുന്നത് വെയിലിന്റെ ആഘാതം കുറയ്ക്കാൻ സഹായിക്കും.
- ശ്വാസകോശ സംബന്ധമായ അസുഖമുള്ളവർ പൊടിക്കാറ്റുള്ളപ്പോൾ നിർബന്ധമായും മാസ്ക് ധരിക്കുക.
വാഹനയാത്രക്കാരും കടലിൽ പോകുന്നവരും ശ്രദ്ധിക്കാൻ
വെള്ളിയാഴ്ചയോടെ താപനിലയിൽ നേരിയ കുറവുണ്ടാകുമെങ്കിലും അറബിക്കടലിൽ തിരമാലകൾ ശക്തമാകാൻ സാധ്യതയുണ്ട്. അതിനാൽ ബീച്ചുകളിൽ പോകുന്നവരും കടലിൽ ഇറങ്ങുന്നവരും ജാഗ്രത പാലിക്കണം. എന്നാൽ ഒമാൻ കടൽ താരതമ്യേന ശാന്തമായിരിക്കുമെന്നാണ് കരുതുന്നത്. റോഡുകളിൽ ദൂരക്കാഴ്ച കുറയുന്ന സാഹചര്യത്തിൽ വാഹനങ്ങൾ തമ്മിൽ കൃത്യമായ അകലം പാലിക്കേണ്ടത് അപകടങ്ങൾ ഒഴിവാക്കാൻ അനിവാര്യമാണ്. ഹസാർഡ് ലൈറ്റുകൾ അനാവശ്യമായി ഉപയോഗിക്കുന്നത് ഒഴിവാക്കി ഹെഡ്ലൈറ്റുകൾ ഉപയോഗിക്കാൻ ശ്രദ്ധിക്കണം.
പുറത്ത് ജോലി ചെയ്യുന്ന തൊഴിലാളികൾക്ക് അധികൃതർ നൽകിയിട്ടുള്ള വിശ്രമ സമയങ്ങളും മറ്റ് നിർദ്ദേശങ്ങളും കർശനമായി പാലിക്കുന്നുണ്ടെന്ന് ഉറപ്പുവരുത്തണം. കുട്ടികളെയും പ്രായമായവരെയും ഈ കാലാവസ്ഥാ മാറ്റം പെട്ടെന്ന് ബാധിക്കാൻ സാധ്യതയുള്ളതിനാൽ അവർക്ക് പ്രത്യേക കരുതൽ നൽകണം. പ്രത്യേകിച്ച് നിർത്തിയിട്ടിരിക്കുന്ന വാഹനങ്ങൾക്കുള്ളിൽ കുട്ടികളെ തനിയെ ഇരുത്തി പോകുന്നത് വലിയ അപകടങ്ങൾക്ക് കാരണമാകും. ദേശീയ കാലാവസ്ഥാ നിരീക്ഷണ കേന്ദ്രം നൽകുന്ന ഓരോ അറിയിപ്പുകളും കൃത്യമായി പിന്തുടരുന്നത് സുരക്ഷിതമായിരിക്കാൻ സഹായിക്കും.
യുഎഇയുടെ വിവിധ ഭാഗങ്ങളിൽ വരും ദിവസങ്ങളിൽ കാറ്റ് കൂടുതൽ ശക്തമാകാൻ സാധ്യതയുള്ളതിനാൽ തുറസ്സായ സ്ഥലങ്ങളിൽ സാധനങ്ങൾ സൂക്ഷിക്കുന്നവർ അവ സുരക്ഷിതമായി കെട്ടിയിടാൻ ശ്രദ്ധിക്കണം. കെട്ടിട നിർമ്മാണ മേഖലയിൽ പ്രവർത്തിക്കുന്നവരും കാറ്റിന്റെ വേഗത കണക്കിലെടുത്ത് ആവശ്യമായ മുൻകരുതലുകൾ സ്വീകരിക്കേണ്ടതാണ്. വരും ആഴ്ചകളിലും താപനിലയിൽ മാറ്റങ്ങൾ ഉണ്ടാകാൻ സാധ്യതയുള്ളതിനാൽ ജാഗ്രത തുടരണമെന്ന് അധികൃതർ ഓർമ്മിപ്പിച്ചു.
ALSO READ: പ്രവാസി കുടുംബങ്ങൾ ജാഗ്രതൈ; കുട്ടികളുടെ കളിപ്പാട്ടത്തിൽ മാരക വിഷാംശം, ഉടൻ മാറ്റുക
പുതിയ വർക്ക് പെർമിറ്റുമായി യുഎഇ: തൊഴിൽ മേഘലകളിൽ വിപ്ലവകരമായ മാറ്റങ്ങൾ പ്രതീക്ഷിച്ഛ് പ്രവാസികൾ
English Summary: The National Center of Meteorology has issued a UAE Weather Update warning of rising temperatures and potential dust storms. With temperatures expected to hit 45°C, residents are advised to take precautions, stay hydrated, and exercise caution while driving due to reduced visibility and rough seas.