പരാജയഭീതിയിൽ 28 സിറ്റിങ് എം.എൽ.എമാർ: സി.പി.എം കേന്ദ്രങ്ങളിൽ കടുത്ത ആശങ്ക; ആരൊക്കെയാണ് ആ സിറ്റിംഗ് എംഎൽഎമാർ? ലിസ്റ്റ് കാണാം

Published:Saturday, 2 May 2026, at 11:08 am| Dubai |Edited:Saturday, 2 May 2026, at 12:08 am

തിരുവനന്തപുരം: കേരള നിയമസഭാ തിരഞ്ഞെടുപ്പിന്റെ ഫലപ്രഖ്യാപനത്തിന് ഇനി വെറും രണ്ട് ദിവസങ്ങൾ മാത്രം ബാക്കിനിൽക്കെ ഭരണകക്ഷിയായ സി.പി.എമ്മിനെ കടുത്ത ആശങ്കയിലാഴ്ത്തിക്കൊണ്ട് പുതിയ റിപ്പോർട്ടുകൾ പുറത്ത് (CPIM). മന്ത്രിമാരടക്കം 28 ഓളം സിറ്റിങ് എം.എൽ.എമാർ പരാജയഭീതി നേരിടുന്നു എന്ന കണക്കുകളാണ് പാർട്ടിക്കുള്ളിൽ നിന്നും പുറത്തുവരുന്നത്.

യു.ഡി.എഫ് തരംഗം ശക്തമായാൽ സി.പി.എമ്മിന്റെ അംഗബലം കഴിഞ്ഞ രണ്ട് പതിറ്റാണ്ടിനിടയിലെ ഏറ്റവും താഴ്ന്ന നിലയിലേക്ക് പോകുമോ എന്നാണ് രാഷ്ട്രീയ നിരീക്ഷകർ ഉറ്റുനോക്കുന്നത്.

ALSO READ: അടുത്ത മുഖ്യമന്ത്രിയാര്? കോൺഗ്രസിൽ വടംവലി; ലീഗിന്റെ പിന്തുണ ആർക്ക്?

കൊച്ചിയിലേക്ക് റെക്കോർഡ് നിരക്ക്; ഗൾഫ് മലയാളികളെ പിഴിഞ്ഞ് വിമാനക്കമ്പനികൾ

മന്ത്രിമാരും പ്രമുഖരും പട്ടികയിൽ

ഇത്തവണ തിരഞ്ഞെടുപ്പിൽ മത്സരിച്ച പ്രമുഖ മന്ത്രിമാരായ എം.ബി. രാജേഷ്, ആർ. ബിന്ദു, വി.എൻ. വാസവൻ എന്നിവർ കടുത്ത മത്സരമാണ് നേരിടുന്നത്. തൃത്താലയിൽ എം.ബി. രാജേഷും ഇരിങ്ങാലക്കുടയിൽ ആർ. ബിന്ദുവും വിജയിക്കുമെന്ന് ഉറപ്പിക്കാൻ പാർട്ടിക്ക് കഴിയുന്നില്ല. കൂടാതെ മണ്ഡലം മാറി മത്സരിച്ച മന്ത്രി വി. അബ്ദുറഹിമാൻ തിരൂരിലും, കെ.ടി. ജലീൽ തവനൂരിലും തോൽവി ഭീഷണി നേരിടുന്നുണ്ട്. ആരോഗ്യവകുപ്പ് മന്ത്രിയായിരുന്ന വീണ ജോർജും ആറന്മുളയിൽ കടുത്ത പോരാട്ടത്തിലാണ്.

ചരിത്രം ആവർത്തിക്കുമോ?

2001-ലാണ് സി.പി.എമ്മിന് രണ്ട് പതിറ്റാണ്ടിനിടയിലെ ഏറ്റവും കുറവ് സീറ്റുകൾ ലഭിച്ചത്, അന്ന് വെറും 23 എം.എൽ.എമാർ മാത്രമാണ് ഉണ്ടായിരുന്നത്. 2021-ൽ അത് 62 ആയി ഉയർത്തിയെങ്കിലും ഇത്തവണ 56 സിറ്റിങ് എം.എൽ.എമാരെ തന്നെ വീണ്ടും മത്സരിപ്പിച്ച തീരുമാനം തിരിച്ചടിയായോ എന്ന സംശയം പാർട്ടിക്കുള്ളിലുണ്ട്. യു.ഡി.എഫിന് അനുകൂലമായ കാറ്റ് വീശിയാൽ സീറ്റുകളുടെ എണ്ണം വലിയ തോതിൽ താഴാൻ സാധ്യതയുണ്ട്.

ജില്ലാതിരിച്ചുള്ള പരാജയ സാധ്യതകൾ

തിരുവനന്തപുരം ജില്ലയിലാണ് ഏറ്റവും കൂടുതൽ സിറ്റിങ് എം.എൽ.എമാർ തിരിച്ചടി നേരിടുന്നത്. നെയ്യാറ്റിൻകര, കാട്ടാക്കട, അരുവിക്കര, നേമം, വർക്കല എന്നിവിടങ്ങളിൽ പാർട്ടിക്ക് വിജയം ഉറപ്പില്ല. കോഴിക്കോട് ജില്ലയിലും സമാനമായ അവസ്ഥയാണ്. വടക്കൻ കേരളത്തിലെ കരുത്തുറ്റ കോട്ടകളിൽ പോലും വിള്ളലുകൾ വീഴുന്നതാണ് പാർട്ടി റിപ്പോർട്ടുകൾ സൂചിപ്പിക്കുന്നത്.

പരാജയഭീതി നേരിടുന്ന പ്രധാന എം.എൽ.എമാരും മണ്ഡലങ്ങളും

• കെ. ആൻസലൻ – നെയ്യാറ്റിൻകര
• ഐ.ബി. സതീഷ് – കാട്ടാക്കട
• ജി. സ്റ്റീഫൻ – അരുവിക്കര
• വി. ശിവൻകുട്ടി – നേമം
• വി. ജോയി – വർക്കല
• സുജിത്ത് വിജയൻപിള്ള – ചവറ
• വീണ ജോർജ് – ആറന്മുള
• എച്ച്. സലാം – അമ്പലപ്പുഴ
• വി.എൻ. വാസവൻ – ഏറ്റുമാനൂർ
• പി. രാജീവ് – കളമശ്ശേരി
• കെ.എൻ. ഉണ്ണികൃഷ്ണൻ – തൃപ്പൂണിത്തുറ
• കെ.ജെ. മാക്സി – കൊച്ചി
• ആർ. ബിന്ദു – ഇരിങ്ങാലക്കുട
• എം.ബി. രാജേഷ് – തൃത്താല
• കെ. ശാന്തകുമാരി – കോങ്ങാട്
• വി. അബ്ദുറഹിമാൻ – തിരൂർ
• കെ.ടി. ജലീൽ – തവനൂർ
• കെ.പി. കുഞ്ഞമ്മദ് കുട്ടി – കുറ്റ്യാടി
• കെ.എം. സച്ചിൻദേവ് – ബാലുശ്ശേരി
• തോട്ടത്തിൽ രവീന്ദ്രൻ – കോഴിക്കോട് നോർത്ത്
• ലിന്റോ ജോസഫ് – തിരുവമ്പാടി
• ഒ.ആർ. കേളു – മാനന്തവാടി
• കെ.കെ. ശൈലജ – പേരാവൂർ

കണ്ണൂരിലെ ആശ്വാസം

പാർട്ടിയുടെ ശക്തികേന്ദ്രമായ കണ്ണൂരിൽ പേരാവൂരിൽ മത്സരിച്ച കെ.കെ. ശൈലജ മാത്രമാണ് തോൽവി ഭീഷണി നേരിടുന്ന ഏക സിറ്റിങ് എം.എൽ.എ. ഇത് മാത്രമാണ് നിലവിൽ സി.പി.എമ്മിന് ആശ്വാസം നൽകുന്ന ഏക ഘടകം. ബാക്കിയുള്ള മണ്ഡലങ്ങളിൽ പാർട്ടിക്ക് വിജയമുറപ്പാണ്. എങ്കിലും മറ്റ് ജില്ലകളിലെ വലിയ തോതിലുള്ള പരാജയ സാധ്യതകൾ പിണറായി സർക്കാരിന്റെ തുടർച്ചയായ മൂന്നാം ഊഴത്തിന് വലിയ വെല്ലുവിളിയായി മാറിയേക്കാം. എക്സിറ്റ് പോളുകൾക്കും രാഷ്ട്രീയ കണക്കുകൂട്ടലുകൾക്കും അപ്പുറം ജനവിധി ആർക്കൊപ്പമാണെന്ന് അറിയാൻ ഇനി രണ്ട് ദിവസത്തെ കാത്തിരിപ്പ് കൂടി വേണം.

ALSO READ: കേരളത്തിൽ യുഡിഎഫ് അധികാരത്തിലേക്ക്; വിവിധ എക്സിറ്റ് പോൾ ഫലങ്ങൾ അറിയാം…

ഉപമുഖ്യമന്ത്രി പദം കിട്ടുമോ? ലീഗിന്റെ നിലപാട് ഇങ്ങനെ..

English Summary: As the Kerala election results approach, CPIM faces a major crisis with 28 sitting MLAs, including several ministers, facing potential defeat. Internal reports suggest a tough fight in key constituencies, raising concerns that the party’s seat count could drop significantly if a UDF wave occurs.