Published: Monday, 12 October 2026, at 5:51pm| Dubai | Edited: Monday, 12 October 2026, at 5:55pm
മിഡിൽ ഈസ്റ്റിലെ വ്യോമ സുരക്ഷാ സമവാക്യങ്ങളെയും ഗൾഫ് രാഷ്ട്രീയത്തെയും മാറ്റിമറിക്കുന്ന പുതിയ അധ്യായത്തിനാണ് സൗദി അറേബ്യ സാക്ഷ്യം വഹിക്കുന്നത്(Houthi Attacks on Saudi Arabia) . ബില്യൺ കണക്കിന് ഡോളർ മുടക്കി സൗദി സജ്ജമാക്കിയ ലോകോത്തര പ്രതിരോധ സംവിധാനങ്ങളെയെല്ലാം വെട്ടിച്ച് യെമനിലെ ഹൂതി മിലിഷ്യകൾ സൗദിയിൽ നടത്തുന്ന വ്യോമാക്രമണങ്ങൾ കേവലം പ്രാദേശിക സംഘർഷങ്ങളുടെ തുടർച്ച മാത്രമല്ല, മറിച്ച് ആഗോള ഭൂപടത്തിലെ സാമ്പത്തിക-രാഷ്ട്രീയ കെട്ടുറപ്പുകളെ ചോദ്യം ചെയ്യുന്ന ഒരു യുദ്ധം കൂടിയാണ്.
അടുത്തിടെ റിയാദിലെ കിങ് ഖാലിദ് അന്താരാഷ്ട്ര വിമാനത്താവളത്തിനു നേരെയുണ്ടായ ആകാശ ആക്രമണം ഒരു സൈനിക നീക്കത്തിനപ്പുറം മറ്റു ചില തന്ത്രങ്ങളുടെയും ഭാഗമാണ്. സൗദിയുടെ സാമ്പത്തിക അടിത്തറയെയും ലക്ഷക്കണക്കിന് പ്രവാസി മലയാളികൾ ഉൾപ്പെടുന്ന സിവിലിയൻ സമൂഹത്തിന്റെ യാത്രാ ഇടനാഴികളെയും ഭീതിയിലാഴ്ത്താത്തുക എന്നതാണ് പ്രഥമ ലക്ഷ്യം.
ദിവസേന ലക്ഷക്കണക്കിന് ആളുകൾ വന്നുപോകുന്ന റിയാദിൽ സർവീസുകൾ നിർത്തിവെക്കേണ്ടി വന്ന സാഹചര്യം ഗൾഫിലെ പ്രവാസി സമൂഹത്തിന്റെ ഉറക്കം കെടുത്തുന്ന ഒന്നായി മാറിയിരിക്കുകയാണ്. നാളെയുടെ സമാധാനാന്തരീക്ഷത്തെക്കുറിച്ചുള്ള ആശങ്കകൾ ഓരോ മനുഷ്യന്റെയും മനസ്സിൽ ശക്തമാക്കാൻ ഇത്തരം സംഭവങ്ങൾ കാരണമാകുന്നുണ്ട്. ഇത് തന്നെയാണ് ഈ ആക്രണമത്തിന് പിന്നിലെ ലക്ഷ്യവും.
സൗദി അറേബ്യ അണിനിരത്തിയ യുഎസ് നിർമ്മിത പാട്രിയറ്റ്, താഡ് തുടങ്ങിയ മൾട്ടി-ലേയേർഡ് പ്രതിരോധ കവചങ്ങൾ മറികടക്കാൻ ഹൂതികൾ ഉപയോഗിക്കുന്നത് തികച്ചും വ്യത്യസ്തമായ ആയുധ തന്ത്രങ്ങളാണ്.
ഇറാന്റെ സഹായത്തോടെ വികസിപ്പിച്ചെടുത്ത പാലസ്തീൻ-2, തൂഫാൻ, ബർക്കൻ തുടങ്ങിയ ദീർഘദൂര ബാലിസ്റ്റിക് മിസൈലുകളും ക്രൂസ് മിസൈലുകളും ഡ്രോണുകളുമായി ചേർത്ത് ഒരേസമയം പ്രയോഗിക്കുന്ന ശൈലിയാണ് ഹൂതികൾ പിന്തുടരുന്നത്.
വിശാലമായ സൗദി-യെമൻ അതിർത്തി പൂർണ്ണമായും സുരക്ഷിതമാക്കുന്നതിലെ പ്രായോഗിക ബുദ്ധിമുട്ടുകളും, വിലകൂടിയ ഇന്റർസെപ്റ്റർ മിസൈലുകളുടെ സ്റ്റോക്കിലുണ്ടായ കുറവും സൗദിയുടെ പ്രതിരോധ വ്യൂഹത്തെ സമ്മർദ്ദത്തിലാക്കുന്നുണ്ട്. കേവലം ആയുധങ്ങളുടെ മേൽക്കോയ്മയല്ല, മറിച്ച് സാമ്പത്തികവും മാനസികവുമായ യുദ്ധമുറകളാണ് ഇവിടെ വിജയം കാണുന്നത്.
ഹൂതികളുടെ ആയുധ താവളങ്ങൾക്ക് നേരെ സൗദി സഖ്യസേന ശക്തമായ പ്രത്യാക്രമണം നടത്തുന്നുണ്ടെങ്കിലും, റിയാദ് വിമാനത്താവളം പോലുള്ള പ്രധാന കേന്ദ്രങ്ങളെ ലക്ഷ്യമിടുന്നതിലൂടെ ആഗോള മാധ്യമങ്ങളുടെ ശ്രദ്ധ പിടിച്ചുപറ്റാനും ലോകരാജ്യങ്ങളുടെ നയപരമായ ഇടപെടലുകൾ അട്ടിമറിക്കാനും ഹൂതികൾക്ക് സാധിച്ചിട്ടുണ്ട്.
റിയാദ് വിമാനത്താവള ആക്രമണവും ഹൂതികളുടെ ലക്ഷ്യവും
ഗൾഫ് മേഖലയിലേക്കുള്ള പ്രവാസി മലയാളികളുടെ പ്രധാന പ്രവേശന കവാടമായ റിയാദ് കിങ് ഖാലിദ് വിമാനത്താവളത്തെ ലക്ഷ്യമിടുന്നത് സൗദിയുടെ വ്യോമമേഖലയിൽ വലിയ ഭീതി ഉയർത്തുന്നുണ്ട്.
വിമാനത്താവളത്തിന്റെ പ്രവർത്തനം താൽക്കാലികമായി നിശ്ചലമായതും വിമാനങ്ങൾ തിരിച്ചുവിട്ടതും പലരുടെയും യാത്രാ ആസൂത്രണങ്ങളെയും തൊഴിൽ മേഖലയെയും കാര്യമായി ബാധിച്ചിട്ടുണ്ട്. സിവിലിയൻ ഗതാഗതത്തിന് ഭീഷണിയുയർത്തി നേട്ടമുണ്ടാക്കാനാണ് ഹൂതികൾ ശ്രമിക്കുന്നത്. ജോലി തേടിയെത്തുന്ന വിദേശികളുടെ ജീവിത സുരക്ഷിതത്വത്തെ ബാധിക്കുന്ന ഇത്തരം അനിശ്ചിതത്വങ്ങൾ മേഖലയിൽ വരും ദിവസങ്ങളിൽ വലിയ സാമ്പത്തിക പ്രതിസന്ധികൾക്കും കാരണമായേക്കാം.
ഹൂതികളുടെ മിസൈൽ- ആയുധ ശേഷി
യെമൻ തലസ്ഥാനമായ സനാ അധീനതയിലാക്കിയ ശേഷം വിദേശ സാങ്കേതിക സഹായത്തോടെയാണ് ഹൂതികൾ തങ്ങളുടെ സൈനിക ശേഷി വർദ്ധിപ്പിച്ചത്.
രണ്ട് ഘട്ടങ്ങളുള്ള ഹൈപ്പർസോണിക് സാങ്കേതികവിദ്യയുള്ള പാലസ്തീൻ-2, ഇറാന്റെ ഖദർ പതിപ്പായ തൂഫാൻ, ബർക്കൻ ബാലിസ്റ്റിക് മിസൈലുകൾ എന്നിവ കയ്യിലുള്ള ഇവർ കുറഞ്ഞ ചെലവിലുള്ള ഡ്രോണുകളും മിസൈലുകളും ഒരുമിച്ച് പ്രയോഗിച്ച് ശത്രുവിന്റെ വ്യോമപ്രതിരോധ സംവിധാനങ്ങളെ ആശയക്കുഴപ്പത്തിലാക്കുന്നു.
സാങ്കേതികമായി എത്ര മുന്നിലായാലും ആധുനിക അസമമായ യുദ്ധമുറകൾക്ക് മുന്നിൽ പരമ്പരാഗത ആയുധ ശേഖരങ്ങൾ എങ്ങനെ പരാജയപ്പെടുന്നു എന്നതിന്റെ ഉത്തമ ഉദാഹരണമാണിത്.
സൗദി പ്രതിരോധ സംവിധാനത്തിന്റെ പരിധികൾ
പാട്രിയറ്റ്, താഡ് തുടങ്ങിയ വിപുലമായ സുരക്ഷാ സംവിധാനങ്ങൾ സൗദിയുടെ പക്കലുണ്ടെങ്കിലും നൂറു ശതമാനം തടയൽ അസാധ്യമാണെന്ന് സുരക്ഷാ വിദഗ്ദ്ധർ വിലയിരുത്തുന്നു.
നീളമേറിയ അതിർത്തിയും, ഹൂതികളുടെ കുറഞ്ഞ ചെലവിലുള്ള നിരന്തര ഡ്രോൺ ആക്രമണങ്ങളേയും, അമേരിക്കൻ നിർമ്മിത ഇന്റർസെപ്റ്റർ മിസൈലുകളുടെ ക്ഷാമവും പ്രതിരോധത്തിന് തടസ്സമാകുന്നുണ്ട്.
കേവലം ആയുധബലം കൊണ്ട് മാത്രം അതിർത്തി സുരക്ഷ ഉറപ്പാക്കാനാകില്ലെന്നും, നയപരമായ ദീർഘവീക്ഷണത്തിലൂടെ മാത്രമേ ശാശ്വത പരിഹാരം കാണാനാകൂ എന്നുമുള്ള വലിയ രാഷ്ട്രീയ പാഠമാണ് ഈ സംഭവവികാസങ്ങൾ നൽകുന്നത്.
ALSO READ: മമ്മൂട്ടി എന്ന മനുഷ്യനും മലയാളി വളർത്തിയെടുത്ത ആൾക്കൂട്ട വിചാരണയും (Column / Opinion )
English Summary: Houthi Attacks on Saudi Arabia targeting King Khalid Airport challenge high-tech air defenses. Utilizing advanced ballistics and drones, these strikes disrupt civilian aviation, creating severe transit hurdles and safety concerns for millions of expats across the Gulf region.